lo parpalhon vagamond

Desempuish lo mes de seteme que tribalhi dens un centro d'integracion de refugiats, en Lituania. Qu'i hèi un tribalh de volontari. Dens lo centro los refugiats son la majoritat de Chechenia, e puish que n'i a quauques d'autes países, d'Afganistan, de Palestinia, d'Ozbequistan, de Vietnam, deu Belarus...

Volèvi hèr ua petita presentacion de la gent dab qui soi cada dia, que son òmes e hemnas com tu i jo, la sola diferéncia qu'ei que saben que poderàn pas jamei tornar au lor país, e açò qu'ei quaucom d'impossible a imaginar, qu'ei ua tortura quotidiana...

Au centro i a ua gojata, de 25 ans, de Chechenia, qu'a 4 mainats, la mei grana qu'a ad entorn de sèt ans, e lo darrèr qu'a tot just un mes ... e lo pair, qu'ei mort en Norvegia .. çò que hasèva acerà ? N'en èi pas nada idea ..

I a tanben ua gojata de Vietnam .. qu'a 17 ans... qu'a viscut tres ans en Russia, a Mòsco, on tribalhava a l'usina, dab un milhèr d'autes asiatics ... en Lituania qu'ei tot soleta, pr'amor que los autes dab qui èra an estats enviat en Vietnam pr'amor que son pas refugiats mes imigrants economics .. e era, qu'espera l'an qui vien, quan averà 18 ans .. sap plan qu'estarà expulsada de la forteressa Euròpa, en Euròpa n'en volen pas deus imigrants ...

Tanben i a l'istòria d'un gojat d'Afganistan de 18 ans, qu'ei arribat en Lituania i a tres o quate ans ... qu'a traversat tots los países entre Afganistan e Euròpa abans d'arribar a Lituania ...dab eth que m'arridi hèra .. peu moment que cerca la hemna de la soa vita, alavetz que m'a demandat se n'èi pas d'amiga charmanta a noste, hehe mes eth n'ei pas afgan per arren, que m'a hèit ua lista de las preferencias fisicas, que sia inteligenta s'en trufa ... mes bon, que'u desencusi, e au lòc d'èster en colèra que m'en arridi ... non ne l'èi pas hèit lo men discors de feminista, pensi pas qu'açò pòt fonccionar dab un gojat qu'a estat educat dens lo regime deus talibans ...

E puish, la mia familha preferida deu centro, la familha d'Ozbequistan ... los paires son arribats en Lituania i a dus ans, shens los mainats ... puish un an après los mainats, qu'ei a díser tres gojats e ua gojata, son arribats dab l'onco, en passant per Mòsco e lo Belarus ... e en arribant a Vilnius que'us an botat dens la preson ...e ara que viven dab los sons paires.. A cada còp que vau au lor apartament que'm volen balhar a minjar, e qu'an arrefusi que s'en saben mau... alavetz dab plàser descobri lo minjar ozbeque, e desbrembi que soi vegetariana .. Lo pair de la familha parla hèra de lengas, l'esperanto, lo rus, l'ozbeque, lo farsi, l'anglès, ... e lo portugués. E lo saunei de la familha qu'ei d'anar víver en Espanha .. mes tà un refugiat n'ei pas possible de cambiar de país, que deven demorar per tostemps dens lo país on an demandat l'asili ...